Kleines Fest-Poem zu Ehren von Paul Hürlimann anlässlich seines 70. Geburtstages am 21.11.2003.

Es git nüd mänge we de Hü!
Ähnlich z'sueche wär vermässe.
Glichlig bis uf's Milli-Mü?
Chasch vo vornherein vergässe.

S'isch e ganz e sältni Rasse,
Isch vom Uussterbe bedroht.
S'hät's nie ggää i groosse Masse
Und di Gröschte sind längscht tot.

Tuusig meined s'seigid Riiter,
Mäng', er seig en Kavalier
Doch min Aschpruch gat vill wiiter:
Ein wo d'Sprach redt vo de Tier!

Ein wo gschpüürt was si wänd säge,
Eine wos cha motiviere,
Eine wos au gern tuet pfläge,
Nüd nu mit de Priis plagiere.

Eine mit de Visione,
Wenes Tier us siner Wahl
Mit sim Wese chönnt belohne
S'Strebe nach em Ideal.

Ein' wo weiss, wo d'Gränze ligged,
Wo mag gwarte mit Geduld,
Wo nüd hirnlos Tämpo figged
Und - wänns harzt - bi sich suecht d'Schuld.

S'isch es Züüg mit euser Zunge,
S'wott kei tüütsches Wort uf d'Lipp'!
Nüd emal em Hü isch's glunge
Z'übersetze HORSEMANSHIP!

Aber eusi Ziit chan änglisch,
Das isch Mode, IN und HIP
Vort'em Schnuderbueb eis bänglisch,
Lehrsch em gschiider Horsemanship!

Ch'glaub hütt zabig simmer vili,
Wos vo dir händ, liebe Paul,
Dass, wer rüeft: "Es Rössli wili!"
Nieme säit: "Du blöde Gaul!"

Dass' Respäkt bruucht, Liebi, Ziit,
Demuet, Uusduur, Energie,
Wämmer je emal so wiit
Wetti cho ir Harmonie

Zwüschet Mäntsch und Tier we Du!
Liebe feine Horseman Hü:
Im Rösseler-Band vo Who-is-Who
Hät's us de Schwiiz chuum meh als drü

Vo Dim Kaliber! Drum mi Bitt:
Gib eus wiiterhin vill mit
Vo dim groosse Ross-Verstand.
S'hät nie z'vill devo im Land!

Und wer's mit de Tier erlickt,
Isch meischtens au mit Mäntsche gschickt,
Lehrt ene die Achtsamkeit,
Wonis vilicht wiiter träit.

Doch bevor er mer vertschlaafed
Oder mich mit Pfiff bestraafed,
Hör ich uuf jetzt eu z'versuume
La das Fäscht la wiiterschuume

Stönd gschnäll uuf und strecked d'Chnü
Lupfed s'Glas: Uf euse Hü!

Christoph Meier