Housi Moser: Dressur

S'git Lüüt, die gä Gas, will si gärn gschnäll fürschi chöme
U s'git Lüüt, die brämse gäng, will se Schiss hei
U de gits Lüüt, die mache beides mitenang
Die Lüüt gä Gas mit de Beine u brämse mit de Häng
Si stirze ungerfüre u schränze obe zrügg
Si wurge u verhebe u chnorze u schwitze
Bis das Charrli nümm uus u ii weiss
U ir Verzwiiflig d'Redli einzeln i d'Höchi lüpft

U die Lüüt sitze - nenei, nid we Tir tänkid ir Spinnwindi
Die Lüüt, wo wette füretschi u hingertschi zur gliche Ziit
Wo jede Aflug vo Muet sofort wider ersticke i ihrer Angscht
Die sitze unger üüs!

Die Lüüt si agsehni Gladiatore
Die trätten uuf als Kuriosum
Guet, normalerwiis luegt niemer zue
Usser so Lüüt, wo mit komische Chapeaus
Schlotternd i so halboffene ungheizte Schiissihüsli hocke
Di klamme Finger ar Tubakpfiiffe oder amne Kafi Schnaps

Die Lüüt, die luege - sowit se überhoupt na öppis gseh
Will meistens hei si dr Grau Star scho operiert
Oder hei e Blindehung näbet em Schiissihüsli
Die luege agsträngt dür ihri ticke Brülle mit Schibe wie Bülacher limachgleser-Böde
Uf - ds'Programmheft
U probiere d'Näme ds läse vo däne Wurgi-Cheibe
U de lüpfe si die, wonene gäng höbele
U mache die ache, wo emne angere meh höbele
U will niemer allne gliichziitig am meischte cha höbele
Isch's de z'letscht emänd glich no spannend
Wer dr bescht Höbeler u Redli-einzeln-Lüpfer isch vo däne

S'bescht a all däne Lüüt isch
Si bruuche fasch kei Platz
Ke Autobahne, ke Überlandstrasse
Ke Kantons- u Gmeindsstrasse
Ke Fäldwäg u Soumpfade
Si bruuche ume ne Parkplatz
Zum Wurge u Verhebe
U Chnorze u Schwitze...

Uf all Fäll gits e Huffe Lüüt.

(C.M.)